మీరు సాఫ్ట్ డ్రింకు ప్రియులా? సోడా అంటే కూడా మీకెంతో ఇష్టమా? అయితే ఈ విషయం తెలుసుకోవాల్సిందే… రోజుకు ఒక సోడా తాగినా మీ లివర్ ప్రమాదంలో పడుతుందిట. ఈ మాటలు అంటున్నది ఎవరో కాదు.. దీనిపై అధ్యయనం చేసిన పరిశోధకులు చెబుతున్న మాటలు. హార్వర్డ్ అనుబంధ బ్రిఘామ్ అండ్ విమన్స్ హాస్పిటల్ అధ్యయనకారులు ఆ మధ్య నిర్వహించిన ఒక స్టడీలో షుగరీ డ్రింకులతో లివర్కు ఎంత ప్రమాదకరమైనదో వెల్లడైంది. షుగరీ డ్రింక్స్ లివర్ మీద చూపించే ప్రభావం ఆందోళన కలిగించే రీతిలో ఉందని వీళ్లు తమ స్టడీలో తేల్చారు.
సాఫ్ట్ డ్రింకుల స్థానంలో ఆరోగ్యకరమైన ప్రత్యామ్నాయాలను డైట్లో చేర్చుకుంటే లివర్ ఆరోగ్యంగా ఉంటుందని సూచిస్తున్నారు. ప్రతి కమర్షియల్ సాఫ్ట్ డ్రింకు శరీరారోగ్యంపై తీవ్రమైన దుష్ప్రభావాలను చూపుతుందని తమ అధ్యయనంలో వీళ్లు తేల్చారు. సాఫ్ట్ డ్రింకు ప్రతి రోజూ తాగడం వల్ల లివర్ తీవ్రంగా దెబ్బతింటుందని వీళ్లు హెచ్చరిస్తున్నారు. ఈ స్టడీని 98,786 స్త్రీలపై చేశారు. ఒక గ్లాసు కార్బోనేటెడ్ డ్రింకు కూడా అస్సలు మంచిది కాదని, దాన్ని తాగొద్దని చెప్పడానికి వంద కారణాలను ఇట్టే చెప్పొచ్చని అధ్యయనకారులు అంటున్నారు.
ఈ సాఫ్ట్ డ్రింకులకు గుండెజబ్బులు, మధుమేహం, ఊబకాయం వంటి మరెన్నో అనారోగ్యాలకు మధ్య సంబంధం ఉండడాన్ని గతంలో చేసిన పలు స్టడీల్లో వెల్లడైన విషయాన్ని అధ్యయనకారులు ఈ సందర్భంగా గుర్తుచేస్తున్నారు. లివర్ జబ్బులతో బాధపడుతున్న, అలాగే ఫైబ్రోసిస్, సిరోసిస్, క్రానిక్ హెపిటైటిస్తో మరణించిన పేషంట్లను తమ స్టడీలో అధ్యయనకారులు పరిశీలించారు. నెలకు మూడు లేదా అంతకన్నా ఎక్కువ సార్లు సాఫ్ట్ డ్రింకులు తాగిన మహిళల కన్నా రోజుకు ఒకటి లేదా ఎక్కువ పర్యాయాలు సాఫ్ట్ డ్రింకులు తాగిన స్త్రీలలో అధిక శాతం లివర్ కాన్సర్, లివర్ జబ్బులతో మరణించినట్టు గుర్తించారు.
షుగర్తో నిండిన ఈ స్వీట్ డ్రింకులకు, క్రానిక్ లివర్ జబ్బులతో సంభవించిన మరణాలకు ఉన్న సంబంధాన్ని తెలిపే తొలి స్టడీ రిపోర్టుగా దీన్ని తాము భావిస్తున్నట్టు కూడా అధ్యయనకారులు ఈ సందర్భంగా పేర్కొనడం గమనించాల్సిన మరో ముఖ్య అంశం. అయితే సాఫ్ట్ డ్రింకుల వినియోగానికి, లివర్ జబ్బులకు ఉన్న సంబంధాన్ని మరింత రూఢీ పరచడానికి ఈ అంశంపై మరిన్ని పరిశోధనలు కొనసాగవలసిన అవసరం ఉందన్న అభిప్రాయాన్ని కూడా పరిశోధకులు వ్యక్తంచేశారు. డైట్ లో షుగర్ డ్రింకులు లేకుండా వాటి స్థానంలో ఆరోగ్యకరమైన ప్రత్యామ్నాయాలను కూడా వాళ్లు సూచించారు.
లివర్ని సహజసిద్ధంగా శుభ్రం చేసే ఎన్నో ఆరోగ్యకరమైన ప్రత్యామ్నాయాలు ఉన్నాయని వీరు అభిప్రాయపడ్డారు. అలాంటి వాటిల్లో లివర్ని ఆరోగ్యంగా ఉంచే కొన్ని డ్రింకులను వీరు ప్రత్యేకంగా పేర్కొన్నారు కూడా. ద్రాక్షరసం లివర్ ఆరోగ్యానికి మంచిదంటున్నారు. ద్రాక్షలో ఎన్నో పోషకాలున్నాయని చెప్తున్నారు. ముఖ్యంగా ఎన్నో ఆరోగ్య ప్రయోజనాలు అందించే రెస్వెరాట్రోల్ ఇందులో ఉండడాన్ని వారు ప్రస్తావించారు. ఇది శరీరంలో యాంటాక్సిడెంట్లను పెంచి ఇన్ఫ్లమేషన్ తగ్గిస్తుందంటున్నారు. అంతేకాదు లివర్ లోని విషతుల్యపదార్థాలను సహజసిద్ధంగా శుభ్రం చేస్తుందని చెప్పారు.
గ్రీన్ టీ కూడా లివర్ కు మంచిదని చెప్పారు. ఇందులో కాట్ చిన్ అనే కాంపౌండ్ లో ఎంతో శక్తివంతమైన యాంటాక్సిడెంట్లు పుష్కలంగా ఉన్నాయన్నారు. అందుకే సుగర్ డ్రింకులకు బదులు గ్రీన్ టీ తాగితే లివర్ ఆరోగ్యంగా ఉంటుందంటున్నారు. అయితే గ్రీన్ టీని కూడా మితం దాటకుండా తీసుకోవాలని సూచిస్తున్నారు. కాఫీ కూడా లివర్ కు మంచిదేనట. ఇది లివర్ ని ఎంతో ఆరోగ్యంగా ఉంచుతుందని పలు రిపోర్టుల్లో సైతం వెల్లడైందిట. కాఫీలో గ్లూటాథియోన్ అనే యాంటాక్సిడెంట్ ఉందిట. ఇది శరీరంలో సహజంగా ఉత్పత్తి అయ్యే ప్రమాదకరమైన ఫ్రీరాడికల్స్ ను తటస్థం చేస్తుందిట.
బీట్ రూట్ జ్యూసు కూడా లివర్ కు చాలా మంచిదట. ఇది పలు పోషకాల నిధి అంటున్నారు. ఇందులో నైట్రేట్స్, యాంటాక్సిడెంట్లు పుష్కలంగా ఉన్నాయి. ఇది లివర్ ఇన్ఫ్లమేషన్ ని తగ్గించడమే కాకుండా శరీరంలో ఆక్సీకరణ దెబ్బతినకుండా పరిరక్షిస్తుందిట కూడా. నిమ్మరసం కూడా లివర్ ఆరోగ్యానికి చాలా మంచిదిట. ఇది లివర్ లోని విషతుల్యమైన మలినాలను బయటకు పంపేస్తుంది. అంతేకాదు ఇందులో యాంటాక్సిడెంట్లు, విటమిన్ సి రెండూ సమృద్ధిగా ఉన్నాయి. ఇవి లివర్ ని పలు జబ్బుల బారి నుంచి సంరక్షిస్తాయిట. రోజులో ఏటైములోనైనా నిమ్మరసం తాగొచ్చని కూడా అధ్యయనకారులు అంటున్నారు.
