Ice Apple Benefits: వేసవి వచ్చిదంటే చాలు మామిడి పండ్లు తెగ కనిపిస్తాయి. వీటితో పాటు పుచ్చకాయలు కూడా! ఈ రెండింటికి మించింది ఒకటుంది. అదే తాటి ముంజలు . అందులో ఉన్న అద్భుతమైన పోషక విలువల గురించి చాలా మందికి తెలియదు కూడా! మనం ముంజలంటున్నాం. తమిళనాడులో వీటినే నుంగు అంటారు. మహారాష్ట్రలో తడ్గోలా అని పిలుస్తారు. ఇంగ్లీషులో ఐస్ ఆపిల్ (Ice Apple) అంటారు. ఇదేదో బాగుంది కదూ! ప్రపంచంలోనే అత్యధికంగా తాటి ముంజలను ఉత్పత్తి చేసే దేశం మనది కావడం ఓ రకంగా గర్వకారణమే!
తాటి ముంజలు అంటే ఏమిటి?
తాటి చెట్టుకు కాసే ఒక ఉష్ణమండల ఫలమే తాటి ముంజలు. తాటి పండు ఎలా ఉంటుందో తెలుసుగా! బూడిద-నలుపు రంగులో ఉంటుంది. అందులో పారదర్శకంగా, జెల్లీలా ఉండే గుజ్జు చాలా తియ్యగా ఉంటుంది. ఈ జెల్లీ మంచులా (Ice) కనిపిస్తుంది కాబట్టి దీనిని ఐస్ ఆపిల్ అని అంటారు. ఇవి ఏప్రిల్ నుండి జూలై వరకు వేసవి కాలంలో లభిస్తాయి. తెలంగాణ, ఆంధ్రప్రదేశ్, తమిళనాడు, ఒడిశా, పశ్చిమ బెంగాల్, బీహార్లోని లక్షలాది గ్రామీణ కుటుంబాలు వీటి అమ్మకం ద్వారానే జీవనోపాధి పొందుతున్నాయి.
పోషకాల గని
తాటి ముంజలలో దాదాపు 95 శాతం నీరే ఉంటుంది. ఇది తక్కువ కేలరీలు కలిగిన పండు కాబట్టి, బరువు తగ్గాలనుకునే వారు దీనిని నిరభ్యంతరంగా తినవచ్చు.
విటమిన్లు: విటమిన్ A, B-కాంప్లెక్స్, విటమిన్ C పుష్కలంగా ఉన్నాయి.
ఖనిజాలు: పొటాషియం, కాల్షియం, ఐరన్, జింక్ మరియు ఫాస్పరస్ వంటి మూలకాలు ఉన్నాయి.
జీర్ణక్రియ: ఇందులో ఉండే ఫైబర్ (పీచు పదార్థం) జీర్ణక్రియకు ఎంతో మేలు చేస్తుంది.
నేషనల్ లైబ్రరీ ఆఫ్ మెడిసిన్ పరిశోధనల ప్రకారం, ఈ పండులోని సమ్మేళనాలు శరీర అవయవాల కణాలను రక్షిస్తాయి. అలాగే పళ్ళు, చిగుళ్ల ఆరోగ్యానికి కూడా ఇవి ఎంతో మేలు చేస్తాయి.
వేసవి ఉపశమనం
వేసవి తాపానికి శరీరం డీహైడ్రేషన్ బారిన పడుతుంది. ముంజలలోని ఖనిజాలు శరీర వేడిని తగ్గిస్తాయి.
ఆయుర్వేదం, సిద్ధ: వీటిని పిత దోషాన్ని తగ్గించడానికి ఉపయోగిస్తారు.
జీర్ణ సమస్యలు: ఎసిడిటీ, గుండెల్లో మంట మరియు అజీర్తికి ఇది ఒక అద్భుతమైన సహజ సిద్ధమైన నివారణి.
ఎనర్జీ డ్రింక్: మార్కెట్లో దొరికే ఎనర్జీ డ్రింక్స్ కంటే ఇవి వేగంగా దాహాన్ని తీర్చి, శక్తిని ఇస్తాయి.
చర్మ సంరక్షణ: వేసవిలో వచ్చే చెమట కాయలు, మొటిమల ఉపశమనానికి ముంజల పైన ఉండే పొరను చర్మంపై రుద్దితే చలవ చేస్తుంది.
ఎలా తినాలి?
ముంజలను సహజ రూపంలో తింటేనే రుచి, ఆరోగ్యం.
చల్లబరిచిన ముంజలు అంటే ఫ్రిడ్జ్లో పెట్టిన ముంజలన్నమాట. ఇవి వేసవిలో మరింత హాయినిస్తాయి.
ముంజల గుజ్జును చల్లని పాలు, యాలకులతో కలిపి మిక్సీలో వేసి మిల్క్ షేక్ లా కూడా తీసుకోవచ్చు.
గ్రామీణ ఆర్థిక వ్యవస్థకు ఆసరా
భారతదేశ గ్రామీణ ఆర్థిక వ్యవస్థలో తాటి చెట్లు కీలక పాత్ర పోషిస్తాయి. ఏప్రిల్ నుండి జూలై వరకు తాటి చెట్లు ఎక్కే కార్మికులకు, చిన్న వ్యాపారులకు ఇవే ప్రధాన ఆదాయ వనరు. అయితే, ప్రస్తుతం తాటి చెట్ల సంఖ్య తగ్గడం మరియు కొత్త తరం ఈ వృత్తిలోకి రావడానికి ఆసక్తి చూపకపోవడం విషాదం.
మామిడి, పుచ్చకాయల మోజులో మనం ఈ అద్భుతమైన సూపర్ ఫ్రూట్ను మర్చిపోతుంటాం. ఎటువంటి రసాయన ఎరువులు లేకుండా ప్రకృతి ప్రసాదించే ఈ తాటి ముంజలను మీ వేసవి డైట్లో భాగంగా చేసుకోండి!
